करसम्बन्धी सही सूचना प्रवाहबाटै स्वेच्छिक कर सहभागीता वृद्धि हुने, प्रशासन-करदाता र लेखा परीक्षक बीच समुधुर सम्बन्ध स्थापित हुने र समग्रमा राष्ट्रिय स्वार्थ अनुकूल काम हुने उनले बताए।
५ सय १८ नक्कली तथा झुठ्ठा मूल्य अभिवृद्धि कर विलको अनुसन्धान सम्पन्न भएपछि सरकारले ऐनमा संशोधन गरी मतियारलाई पनि आधा सजाय हुने व्यवस्था गरेको छ। गलत काम गर्ने लेखा परीक्षक पनि सजायको भागीदार हुने कुरामा सजग गराउँदै उनले सदैव सदाचार पद्दतिमा रहन सुझाव दिए।
कर कार्यालयमा बुझाउने प्रयोजनका लागि एक प्रकारको र बैंकमा ऋण लिन अर्को प्रकारको विवरण तयार गरी लेखा परीक्षकहरुले दोहोरो चरित्र प्रदर्शन गर्ने गरेका छन् भन्ने आलोचनामा सत्यता भए सच्याउन उनले अनुरोध गरे।
विभागका महानिर्देशक टंकमणि शर्माले विभाग, आईक्यान र अडानले संयुक्त रुपमा मिलेर आचार संहिता निर्माण गर्ने जानकारी दिए। आईक्यानका अध्यक्ष मधुवीर पाण्डेले कर अधिकृत र लेखा परीक्षक दुवैले समयअनुसार आफूलाई दक्षताको उच्च कसीमा राख्नु पर्ने सल्लाह दिए। अडानका अध्यक्ष कमल खरेलले लेखा परीक्षकले राज्यलाई सघाउने र इमान्दारितापूर्वक काम गर्ने बताए।
महासचिव उमेश ढकालले कर प्रशासनसँग मिलेर राष्ट्र निर्माणको संयुक्त अभियानमा सहभागी हुने विचार व्यक्त गरे। साउन २० मा नेपाल अडिटर्स एशोसियनले अडान डे मनाउँदै आएको छ।