अहिले नेपाल सेटेलाइटले मध्यपश्चिमका दुई सय ७२ गाउँमा दूरसञ्चार सेवा दिइरहेको छ। जेडटीइले पूर्वाधार निर्माण गरेर हस्तान्तरण गरेपछि हेलो नेपाल जीएसएमको ब्राण्डमा रहेको नेपाल सेटेलाइटको मोबाइल सेवा नारायणघाटदेखि कञ्चनपुरसम्म विस्तार हुनेछ। नेपाल स्याटेलाइट टेलिकम कम्पनी प्रालिका सञ्चालक अजेयराज सुमार्गी र जेडटीइका प्रमुख कार्यकारी अधिकृत स्यू लेले बुधबार हस्ताक्षर गरेका छन् । हस्ताक्षरपछि सुमार्गीले तेस्रो चरणमा

मध्यमाञ्चल र पूर्वाञ्चलमा सेवा विस्तार गर्ने लक्ष्य रहेको बताए । दुई अर्ब लगानीमा सुरु भएको नेपाल स्याटेलाइटमा साइप्रसको एयर वेलको ५० प्रतिशत सेयर छ। त्यसैगरी मुक्तिश्रीको ४०, सम्झना अर्याल (सुमार्गी)को पाँच, पाकिस्तान मोबाइल कम्युनिकेसनको तीन र सेवा टेलिकम बंगलादेशको दुई प्रतिशत सेयर रहेको छ। यो सम्झौतासँगै स्याटेलाइटमा एक अर्ब ८० करोड लगानी थप हुनेछ। स्याटेलाइटले इन्भेस्टमेन्ट बैंक, मेघा बैंक र नविल बैंक मार्फत ऋण लिएको छ ।

केही दिन अगाडि मात्र नेपालको एनसेलमा लगानी रहेको भनिएको टेलियोसोनेराले स्टकहोममा पत्रकार सम्मेलन गरेर नेपाल स्याटेलाइट टेलिकमको ७५ प्रतिशत सेयर आफूले किनेको सार्वजनिक गरेको थियो। माओवादी नेता कृष्णबहादुर महरा सञ्चारमन्त्री रहेका बेला ऐन र कानुनका छिद्रलाई उपयोग गर्दै निक्कै न्यून अनुमती, रोयल्टी र नविकरण शुल्कमा अनुमति दिइएको थियो।

नेपाल स्याटेलाइटको अनुमती यसै वर्ष फागुनमा सकिँदैछ। माओवादी सरकारमा रहेको बेला यसले आवश्यक भन्दा बढि फ्रिक्वेन्सी ओगटेर राखेको थियो। सुमार्गी माओवादी अध्यक्ष प्रचण्डका ब्यापारिक साझेदार र लगानी ब्यबस्थापकका रुपमा चिनिन्छन् ।

अहिले पनि स्याटेलाइटसँग १३.४ मेगाहर्ज फ्रिक्वेन्सी छ। जिएसएम मोबाइलका लागि महत्वपूर्ण मानिने ९०० मेगाहर्ज ब्याण्डमा पनि ४.४ मेगाहर्ज फ्रिक्वेन्सी स्याटेलाइटसँग छ। २० अर्ब नविकरण शुल्क तिर्न नसक्नै भन्दै आएको एनसेलले फ्रिक्वेन्सीका लागि नै स्याटेलाइट खरिद गरेको सार्वजनिक भइसकेको छ। दूरसञ्चार क्षेत्रका विज्ञहरु एनसेलले २० अर्ब नतिर्नका लागि कानुनी छिद्रको प्रयोग गर्न स्याटेलाइट टेलिकम किनेको बताउँछन्।

-onlinekhabar