इतिहास निर्माणको पर्खाइ, 'भारतविरुद्ध सबै शक्ति खर्चनेछौं'

काठमाडौं, भदौ ३१ (नागरिक)- दक्षिण एसियामा महिला फुटबलको नम्बर १ टोली बन्ने अवसर अब नेपाल र भारतसँग मात्र बाँकी छ। बाँकी ६ राष्ट्रसँग त्यो मौका छैन। कारण सबै टोली श्रीलंकामा जारी दोस्रो महिला साफ च्याम्पियनसिपबाट बाहिरिसकेका छन्।

 
साफ च्याम्पियनसिपका निर्विवाद बलियो टोली पनि नेपाल र भारत नै हुन्। यो प्रतियोगितामा पनि फाइनलसम्म पुग्दा दुवै अपराजित छन्। त्यसैले दुवै टोली लगातार दोस्रोपटक फाइनलमा एकअर्काको सामना गर्दैछन्। भारत त्यही टोली हो, जसलाई नेपालले महिला फुटबलमा अहिलेसम्म हराउन सकेको छैन।
यसपालि भारतसँगै नेपाललाई पनि च्याम्पियन टोलीका रूपमा सुरुबाटै हेरिएको थियो। अपेक्षाअनुरुप सेमिफाइनलसम्म नेपालले आफूलाई अब्बल प्रमाणित गरिसकेको छ। अब मात्र टोली इतिहासको एक कदम पछाडि छ। नेपालले एउटै खेलको नतिजाबाट दोहोरो खुसी प्राप्त गर्न सक्छ, तर त्यसका लागि फाइनलमा भारतलाई पराजित गर्नुपर्छ। भारतलाई हराउन सके नेपाल दक्षिण एसियाको नयाँ च्याम्पियन बन्नेछ भने छिमेकीसँगको लगातार तीन खेलको पराजय शृंखला पनि रोकिनेछ।
दुई वर्षअघि बंगलादेशमा दक्षिण एसियाली खेलकुद (साग) को समूह चरण र फाइनल तथा त्यही वर्ष ढाकामै पहिलो साफ च्याम्पियनसिपको फाइनलमा नेपाल भारतसँग पराजित भएको थियो। आइतबार नेपाल विजयी भए झन्डै दुई दशकयताको फुटबल उपाधि खडेरी चिरिनेछ। सन् १९९३ मा पुरुष फुटबल टोलीले दक्षिण एसियाली खेलकुदमा स्वर्ण पदक जितेयता नेपालले कुनै पनि फुटबल उपाधि जितेको छैन।
नेपाली टोली प्रशिक्षक किशोर केसीले सुरुआतबाटै उपाधिलाई लक्ष्य बनाएका थिए। 'हामी अहिले फाइनलमा केन्द्रित छौं। इतिहास निर्माणभन्दा एक पाइला टाढा छौं,' केसीले फाइनलअघि भनेका छन्, 'यद्यपि भारतविरुद्ध खेल्न सहज छैन। त्यसका बाबजुद हामी जित्नका लागि सबै शक्ति खर्चने छौं।'
नेपालले सेमिफाइनलबाहेक सबै खेल सजिलै जित्यो। तर भारतको यात्रा नेपालको भन्दा निकै सहज थियो। टोलीको सेमिफाइनल झनै सहज रह्यो। नेपालले समूह चरणमा ७-१ ले हराएको अफगानिस्तानलाई सेमिफाइनलमा ११-० ले पराजित गर्दै भारत फाइनल पुगेको हो। तर नेपालले श्रीलंकाविरुद्ध सेमिफाइनलमा अघिल्ला खेलमा भन्दा चुनौतीको सामना गर्नुपर्‍यो। पहिलो हाफमा टोलीले गोलको खातै खोल्न सकेन। तथापि दोस्रो हाफमा ३ गोल गरेर टोलीले भारतसँग चौथो भेट पक्का पारेको थियो।
भारतले ४ खेलमा ३० गोल गर्‍यो भने एक गोल खाएन। नेपालले २० गोल गर्दा १ गोल खाएको छ।
प्रशिक्षक केसी फाइनलमा भारतको कमजोरीको फाइदा उठाउने बताउँछन्। 'भारतले अहिलेसम्म सजिलो टोलीसँग मात्र खेलेको छ। वास्तवमा उनको रक्षापंक्ति र गोलकिपरको परीक्षण भएको छैन,' उनको दाबी छ, 'त्यो कमजोरीमा फाइदा उठाउने फरवार्ड र मिडफिल्डर हामीसँग छन्। त्यसको फाइदा उठाउन सके हाम्रो जित्ने सम्भावना बढ्छ।'