गोरखा, चैत्र ९ - गोरखा दरबार तर्फ जाँदै गर्दा शुक्रबार दिउँसो गोरखा नगरपालिका सतिपिपलमा लडेर घाइते भएका पर्यटकको हेलिकप्टरबाट उद्दार गरिएको छ ।

गोरखा सदरमुकामबाट गोरखा दरबार र गोरखकाली मन्दिर जाँदै गर्दा बाटोबाट भिरमा लडेर घाइते भएकी बेलायती नागरिक सुसान ज्याक्लिनको काठमाडौँबाट आएको डाइनेस्टिक नाईन एन एजेए हेलिकप्टरले उद्दार गरेको हो ।

साथीहरु सँग रहेकी ६५ वषिर्या सुसानको लडेर टाउको र शरीरका विभिन्न भागमा चोट लागेको छ । टाउकोमा १३ वटा टाका मारिएको छ । गोरखा अस्पतालमा सामान्य उपचार पछि उनलाई हेलिकप्टरमा राखेर काठमाडौँ लगिएको हो । गोरखा अस्पतालले सुविधा सम्पन्न अस्पतालमा रिफर गरेपछि काठमाडौँ लगेको उनको साथीहरुले बताए ।

हरमटारी खेलकुद मैदानबाट हेलिकप्टरले घाइतेको उद्दार गरेको जिल्ला प्रहरी कार्यालयले जनाएको छ । गोरखा भ्रमणका लागि आएको बेलायती नागरिकको टोली दुर्घटनामा परेको प्रहरी निरिक्षक सुनिलजङ्ग शाहले बताए । साथीहरु, स्थानियबासी र प्रहरीको टोलीले सुसानलाई उद्दार गरेर अस्पताल ल्याएको थियो । नटराईज टुर एण्ड ट्राभल कमलादीले उनीहरुलाई दुई दिने गोरखा भ्रमण गराउँदै पोखरा लैजान कार्यक्रम थियो । घाईतलाई काठमाडौँ लगेपनि बाँकी पर्यटक यहाँ नै छन् ।   

गोरखा दरबार तर्फ जाँदै गर्दा शुक्रबार दिउँसो गोरखा नगरपालिका सतिपिपलमा लडेर घाइते भएका बेलायती पर्यटकको हेलिकप्टरबाट उद्दार गरिंदै । तस्बिर : सुदिप कैनी/ईकान्तिपुर