पुलिस र संकटाको विजयी सुरुवात

काठमाडौं, भदौ ३१ (नागरिक)- नेपाल पुलिस क्लब र सिएमजी क्लब संकटाले एनसेल कप फुटबलमा विजयी सुरुआत गरेका छन्। यद्दपी दुवैको जितको कथा फरक रह्यो। संकटाले राष्ट्रिय लिगको उपविजेता यति हिमालयन शेर्पालाई १-० ले स्तब्ध पार्‍यो। अर्को खेलमा ए डिभिजन र राष्ट्रिय लिगको विजेता पुलिसले सरस्वती क्लबलाई ६-२ ले हरायो। पहिलो खेलको नतिजाले दुई प्रशिक्षकको फरक अनुभव रह्यो। ७ बर्षपछि संकटा फर्केका प्रशिक्षक महेश्वर मुल्मीले भने,' केटाहरुले सोचेभन्दा धेरै राम्रो खेले। म धेरै खुसी छौं। कम्तिमा क्वार्टरफाइनल सम्मको लक्ष्य बनाएका छौं। खेलाडीमा केही गरेर देखाउने भावना छ।'

 
सल्याण खड्कीले ६२ औं मिनेटमा गरेको एकमात्र गोलले टोलीले समूह 'सी' मा तीन अंक जोड्यो। सोबबहादुर मल्लले स्यामुएल अनगोनोलाई पेनाल्टी बक्समा लडाएपछि संकटाले पेनाल्टी पाएको थियो। सल्याणको पेनाल्टी प्रहार हिमालयन गोलकिपर विनय श्रेष्ठले रोकेर पनि फुत्काएपछि त्यहि रिवाउन्डमा उनी गोल गर्न सफल भए।
पहिलो हाफमा पाएका केही राम्रा अवसर उपयोग गर्न नसक्नु हिमालयनको हारको अर्को कारण थियो। विश्वास श्रेष्ठको क्रसमा दीनेश कार्कीले ट्याप गरेको बल संकटाका विदेशी गोलकिपर पिरीले रोके भने कुञ्जन गुरुङको क्रसमा अनमार्क गणेश खड्काको प्रहार पोस्ट नजिकबाट बाहिरीयो। पुकार गहतराजको लामो फ्रिकिक र गणेशको अर्को प्रहारलाई पनि गोलकिपरले बचाए। रक्षक सचिन्द्र धिमाल सुरुआतमै घाइते भएकाले पनि हिमालयनमाथि दबाब थपिएको थियो।
झन्डै पाँच बर्षपछि प्रशिक्षणमा फेर्केका हिमालयनका अर्जुन लामाले अनुभवको कमीका कारण हार्नुपरेको बताए। ' नयाँ खेलाडी छन्। अनुभवको कमी छ ,' उनले भने,' अनुभवी खेलाडी नै घाइते हुँदा त्यत्तिकै अनुभवी खेलाडी हामीसँग थिएन।'
चेतन घिमिरेको पुनरागमनसँगै समूह 'डी' मा पुलिसले दमदार सुरुआत गर्‍यो। तीन बर्षअघि लिगका खेल्दा घुडामा चोट बोकेपछि चेतन फुटबलबाट टाढा थिए। कप्तान जुमानु राईले पहिलोसहित दुई गोल गरेको खेलमा पर्वत पाण्डे, भोला सिलवाल, रमेश कटुवाल र भरत शाहले १-१ गोल थपे।
दोस्रो मिनेटको जुमानुको सहज गोल योगश श्रेष्ठको पासमा भएको थियो। पर्वतले १९ औं मिनेटमा झन्डै २५ यार्डबाट फ्रिकिकमा लोभलाग्दो गोल गर्दै अन्तरलाई दोब्बर पारे। त्यसको एक मिनेटपछि नै तान्जानियका योना एलिसले पुलिसका गोलकिपर अनुभवी गोलकिपर रितेश थापालाई विट गर्दै आकर्षक गोल गरे। रितेशले यो सिजन घरेलु फुटबलमा खाएको यो पहिलो गोल हो। वैशाखमा पुलिस एक गोल नखाइ च्याम्पियन भएको थियो।
३४ औं मिनेटमा भोला सिलवालले पुलिसका लागि तेस्रो गोल गरे। पेनाल्टी बक्समा योगेशले पास मिलाएपनि अनमार्क भोलाले सहजै गोल गरेका थिए। पर्वतले पास दिएको बलमा रमेशले ६२ औं मिनेटमा गोल थपे। ८० औं मिनेटमा भरत शाहं र जुमानुले ८५ औं एक एक गोल थपे। खेल सकिन एक मिनेट बाँकी रहँदा सरस्वतीका योनाले गोल फर्काएपनि त्यसले परिणाममा फरक पारेन।
पुलिस प्रशिक्षक विराटकृष्ण श्रेष्ठले पानी जमेको मैदानमा खेल्न गाह्रो पर्ने बताए। ' यस्तो मैदानमा खेल्न गाह्रो हुन्छ ,' उनले भने,' त्यसले गर्दा सुरुमा पास मिल्न सकेन। पहिलो खेलमा कही दबाब पनि हुन्छ। ' सरस्वतीका प्रशिक्षक प्रदीप नेपालले सुरुआतकै गोलका कारण टोली दबाबमा परेको बताए।
एनसेल कपमा आइतबार
एपिएफविरुद्ध फ्रेन्ड्स (१:०० बजे)
एनआरटीविरुद्ध आर्मी (३:०० बजे)