एप्पल र सामसुङबीचको कानुनी लडाइँ तिब्र बन्ने क्रममा पछिल्लोपटक सामसुङले केही राहत महसुस गरेको छ भने एप्पलले झट्का बेहोरेको छ ।

जापानको एक अदालतले सामसुङले एप्पलको पेटेन्ट अधिकार उल्लंघन नगरेको फैसला गरेपछि अमेरिकी अदालतले केही दिनअघि गरेको फैसलाबाट थलिएको सामसुुङको घाउमा केही मलहम लागेको विश्लेषकहरुले बताएका छन् ।

टोक्यो अदालतले आफ्नो पेटेन्ट अधिकार सामसुङले उल्लंघन गरेको भन्ने एप्पलको दाबी खारेज गरिदिएको हो । सामसुङले गैरकानुनी तरिकाबाट उसका आइफोन तथा आइप्याड ट्याब्लेटको प्रविधिको नक्कल ग्यालेक्सी स्मार्टफोन तथा ट्याबमा गरेको एप्पलको दाबी थियो ।

टोकियो अदालतको फैसलालाई स्वागत गर्दै सामसुङले आफुले एप्पलको कुनैपनि प्रतिलिपि अधिकार उल्लंघन नगरको बताएको छ ।