काठमाडौ, भाद्र १८ - माओवादी लडाकुको रेखदेख, समायोजन र पुनःस्थापना सम्बन्धी विशेष समिति को बैठकमा शिविरमा भएको भ्रष्टचारको छानविनको आवाज उठेको छ । एमाओवादी पार्टीले समेत आन्तरिक रुपमा छानविन थालेकोले समितिले पनि छानविन गर्नुपर्ने माग उठेको हो ।

सोमबार बसेको बैठकमा समिति सदस्य एंव कांग्रेस नेता रामशरण महतले शिविरमाथि विशेष समिति को नियन्त्रण रहेकाले त्यहाँ भएको भ्रष्टाचारका लागि नैतिक रुपमा समितिमाथि पनि प्रश्न उठ्न उल्लेख गरे । उनले बैठकमा शिविर भित्र भएको भ्रष्टचारको समितिले छानविन गरी दोषीलाई कारवाहीको दायरामा ल्याउनुपर्ने माग गरे । उनको मागमा एमाओवादी बाहेकका समिति सदस्यहरुले समर्थन जनाएका थिए ।

'एमाओवादी स्वंयले शिविरमा भ्रष्टाचारको आशंकामा छानविन सुरु गरेको छ,'बैठकपछि महतले भने 'भ्रष्टाचार नियन्त्रण गर्न नसक्दा समितिमाथि पनि नैतिक प्रश्न उठ्छ ।'