३ चैत, काठमाडौं । इङ्ग्लिस प्रिमियर लिग फुटबलमा डिफेण्डिङ च्याम्पियन म्यानचेष्टर सिटीको उपाधी सम्भावना लगभग सकिएको छ ।

शनिबार भएको खेलमा १० खेलाडीमा सिमित इर्भटनसँग २-० ले लज्जास्पद हार व्यहारेपछि उपाधी होडमा र्फकने सिटीको सम्भावना सकिएको हो । लिगमा ९ खेल खेल्न बाँकी सिटीको ५९ अंक छ र एक खेल कम खेलेको लिग लिडर म्यानचेष्टर युनाइटेडभन्दा १२ अंकले पछि छ । शनिबार हुने खेलमा रिडिङलाई पराजित गर्न सके युनाइटेडले १५ अंकको अग्रता लिनेछ ।

घरेलु मैदानमा भएको खेलमा इभर्टनले लिओन उस्मानको गोलबाट ३२ औं मिनेटमा अग्रता लिएको थियो । खेलको ६१ औं मिनेटमा स्टीवन पिनार रातो कार्ड खाँदै मैदानबाट बाहिरिएपछि इभर्टन १० खेलाडीमा सिमित भयो । तर, सिटीले त्यसको फाइदा उठाउन सकेन ।

खेलको ९० औं मिनेटमा निकिका जेलाभिकले गोल गर्दै इभर्टनलाई २-० को जित दिलाए ।