नेपाली सिने बजारमा चलचित्र ‘छड्के’ चर्चामा छ । माधव वाग्ले र नरेन्द्र महर्जनको लगानीमा तयार भएको यो सिनेमा फागुन ११ गतेबाट प्रदर्शनमा आउने तयारीमा छ । चलचित्रले सुस्ताएको चलचित्र बजारलाई तताउने आशा आम सिनेकर्मीले गरेका छन् ।निगम श्रेष्ठको कथा तथा निर्देशनमा तयार भएको सिनेमामा सौगात मल्ल, रबिन तामाङ, नम्रता श्रेष्ठ, अर्पण थापा, दयाहाङ राई, प्रतिकराज न्यौपाने, विपिन कार्की, निकुन श्रेष्ठ, कामेश्वर चौरसिया लगायतका कलाकारको अभिनय छ । युवापुस्तालाई लक्षित गरेर तयार पारिएको चलचित्रमा नाइट व्यान्डको संगीत, संजय लामाको छायांकन, योगेन्द्र श्रेष्ठको द्वन्द्व, लोकेश बज्रचार्य र दिर्घ खड्काको सम्पादन छ ।

चलचित्रलाई स्कुल र कलेजका विद्यार्थीले अनिवार्य रुपमै हेनुै पर्ने दाबी निर्माता माधव वाग्लेले गरेका छन् । चलचित्रमा बोटनीका विद्यार्थीहरुको गतिबिधीलाई समावेश गरिएको छ । ‘बनमारा’ नामक एउटा झारका बिषयमा अनुसन्धान गर्न गएका विद्यार्थीहरुको कथालाई सिनेमाले उठान गरेको छ । बोटनीका विद्यार्थीहरु चितनव राष्ट्रिय निकुञ्जमा बनमारा झारको अनुसन्धान गर्न पुगेको दृश्य चलचित्रमा हेर्न पाइनेछ । चलचित्रमा नायिका नम्रता श्रेष्ठलाई फरक गेटअपमा देख्न सकिन्छ । यसअघिका चलचित्रमा नायकसँगको रोमान्समा रुमलिएकी नम्रता ‘छड्के’ मा भने भिन्न रुपमा उभिएकी छिन् ।