सिमाला
|
चलचित्र 'सिमाला' काठमाडौंमा प्रदर्शन भैसकेको छ। आज शुक्रबारदेखि यो चलचित्र मोफसलका हलहरूमा प्रदर्शन हुँदैछ। आर बी ए फिल्म्सको ब्यानरमा निर्माण गरिएको यो चलचित्रको निर्माण तथा निर्देशन रुद्र गुरुङले गरेका हुन्। यो चलचित्रमा हिमाली भेकमा प्रचलितमा सिमालाको सन्दर्भमा प्रेमकथा बुनिएको छ। फरक सांस्कृतिक एवं भौगोलिक परिवेशका कारण चलचित्रले भिन्न स्वाद बोकेको बताइन्छ। चलचित्रमा सिमालाको अवैध तस्करी तथा त्यससँग जोडिएकी एउटी युवतीको प्रेमकथा समेटिएको छ। हिमाली युवतीहरूले घाँटीमा लगाउने एक प्रकारको गहनालाई सिमाला भनिन्छ, जुन अमूल्य पत्थरबाट बन्छ। अहिले खासै नपाइने र लोपोन्मुख यो मालालाई ४० लाखसम्म पर्न सक्छ भने एजेन्टहरूमार्फत यसको अवैध व्यापार पनि हुन्छ। यो चलचित्र भने सिमालाको सांस्कृतिकतामा भन्दा पनि त्यससँग जोडिएकी एक युवतीको प्रेमकथामा आधारित छ।
चलचित्रको कथा तथा पटकथा रामबाबु गुरुङले लेखेका हुन्। करिब ३३ दिन मुस्ताङमै बसेर छायांकन गरिएको यो चलचित्रमा मुस्ताङको सुन्दर प्राकृतिकसँगै सामाजिक-सांस्कृतिक परिवेश देख्न पाइनेछ। सिमालाको अवैध व्यापारका क्रममा मुस्ताङ पुग्ने राजेशपायललगायत अन्य पात्रको स्थानीय बासिन्दाहरूसँग हुने सम्बन्धमार्फत चलचित्रको कथा अघि बढाइएको छ। चलचित्रका गीत श्रवण मुकारुङ र भूपाल राईले ले खेका छन्। गायक राजेशपायल राईले पहिलो पटक अभिनय गरेको यो चलचित्रमा उनी नकारात्मक भूमिकामा देखिन्छन्। चलचित्रमा मनोज आर.सी., दिप्ती गुरुङ, निर्भिक राई, रोशनी कार्की आदिले पनि अभिनय गरेका छन्। यो चलचित्रमा प्रकाश गुरुङ, कन्काइष्ट राई तथा विभूषण बस्नेतको संगीत निर्देशन छ। चलचित्रको छायांकन क्यानाडाका छायांकार डेबिड चाउले गरेका हुन्। चलचित्रमा अजय स्याङ्तेनको नृत्य निर्देशन छ।
|
|
