महिलासहित पक्राउ परेका थिए पारस

काठमाडौँ, मंसिर १३ (नागरिक) - लागू औषध मुद्दामा तारिख खेप्दै गरेका पूर्व युवराज पारस शाह थाइल्यान्डको पर्यटकीय शहर फुकेटको एउटा होटलबाट महिलासहित पक्राउ परेको खुलासा भएको छ। थाई वेबसाइट ब्याङ्कक पोस्ट र द फुकेट न्युजले स्थानीय प्रहरीलाई उद्‍धृत गर्दै आफ्नो अनलाइन संस्करणमा दिएको जानकारी अनुसार पारस एक रात जेल पनि बसेका थिए। प्रहरीले पारससँगै पक्राउ परेकी महिलाको परिचय भने खुलाएको छैन। कोठामा पुरुष र महिलाबीच झगडा चर्किएपछि होटल व्यवस्थापनले प्रहरी डाकेको थियो।

'विवाद मिलाउने क्रममा प्रहरीले प्रतिबन्धित लागू औषध भेट्टाएको थियो। महिलाले अपराध स्वीकारे पनि पारसले भने लागू औषध आफ्नो नभएको बताएका छन्,' नाम उल्लेख नगर्ने शर्तमा ती प्रहरी अधिकारीलाई उद्‍धृत गर्दै ब्याङ्कक पोस्ट लेख्छ - प्रहरीले उनको पासपोर्ट जफत गरेको छ। तारिख खेप्न उनी दुई पटक अदालतमा उपस्थित भइसके।'

थाई कानुनअनुसार लागुऔषध मुद्दाको छिनोफानो हुन कम्तीमा तीन महिना लाग्छ। प्रहरीले उनलाई ३ दशमलव ४ ग्राम प्रतिबन्धित गाँजा राखेको अभियोग लगाएको छ।