क्रिकेटमा लगानी गर्न दाहालले सरकारलाई सल्लाह दिने


  • क्रिकेट खेलाडीलाई एमाओवादीको सम्मान



    काठमाडौ, भाद्र २८ - मलेसियामा भदौ १८ देखि २५ गतेसम्म भएको आईसीसी विश्व क्रिकेट लिग डिभिजन–४ मा जित हात पार्दै डिभिजन ३ मा प्रवेश गर्न सफल खेलाडी सम्मानित भएका छन् । 
    विजेता खेलाडीलाई आज एनेकपा (माओवादी) को केन्द्रीय कार्यालय, पेरिसडाँडामा आयोजित कार्यक्रममा सो पार्टीका अध्यक्ष पुष्पकमल दाहालले सम्मानपत्र, दोसल्ला, अबिर र माला लगाएर सम्मान गरेका हुन् ।
    खेलाडीलाई सम्मान गर्दै अध्यक्ष दाहालले खेलाडीको जितले समग्र नेपाली जनताकाको छाती गर्वले चौडा भएको बताए । उनले खेलकुद राष्ट्र विकासको मापन भएकाले खेलाडीलाई नेपाल सरकारले उचित सम्मान गर्नुपर्ने बताउँदै राज्यले विशेष गरी क्रिकेटमा बढी लगानी गर्नुपर्ने सुझाव दिए । उनले भने, 'म सरकारलाई पार्टीका तर्फबाट क्रिकेट खेलमा बढी लगानी गर्न सल्लाह दिन्छु ।'
    दक्षिण एसियाली क्षेत्रमा क्रिकेट खेलको लोकप्रियता बढ्दै गएको बताउँदै अध्यक्ष दाहालले क्रिकेट खेलको भविष्य उज्ज्वल देखिएको बताए । उनले नेपालका राजनीतिक दलहरुले पनि खेलकुदमा भएको सामूहिक भावनालाई आत्मसात् गर्नसके वर्तमान राजनीति अन्योल हल हुँदै देश समृद्धिको बाटातर्फ उन्मुख हुने विश्वास व्यक्त गरे र
    कार्यक्रममा शान्ति तथा पुनःनिर्माणमन्त्री टोपबहादुर रायमाझीले  खेलकुदलाई जनताको सरोकार र अधिकारका रुपमा लैजानुपर्ने बताए ।
    नेपाली क्रिकेटका टिम कप्तान पारस खड्काले सबै क्षेत्रबाट उचित सहयोग पाएको खण्डमा आफूहरुको खेल प्रदर्शन अझ उत्कृष्ट हुने बताए । खड्काले जितसँगैका यस्ताखाले सम्मानले आफूहरुलाई विश्व कप खेल्ने सम्भावना र जाँगरमा अझ हौसला मिल्ने उल्लेख गरे ।