१८ साउन, प्यूठान । प्यूठानको जिल्ला अस्पतालमा कार्यरत डाक्टरहरु एक हप्तादेखि विदा बसेपछि उपचारमा आउने विरामीहरु समस्यामा परेका छन् । पाँच जना एमविविएस डाक्टर दरवन्दी रहेको अस्पतालमा अहिले एक जना मात्र दरवन्दीका र दुई जना करारका डाक्टर कार्यरत छन् ।

जिल्ला स्वास्थ्य प्रमुख डाक्टर उमाशंकर प्रसाद चौधरी र अर्का करारका डाक्टर विवेक ढकाल अहिले कार्यालयमा छैनन् । डाक्टर सुरज धौभडेलले मात्र उपचार गर्नुपर्दा विरामीलाई समस्या हुने गरेको हो ।

बषर्ायामसँगै प्यूठान अस्पतालमा विरामीको चाप बढ्न थालेको छ । दैनिक सरदर २० देखि ३० जना विरामी आउने जिल्ला अस्पतालमा हिजोआज दैनिक १ सय ५० देखि २ सय सम्म विरामी आउने गरेका छन् । झाडापखाला, भाइरल ज्वरो, टाइफाइट, जण्डिस र सामान्य रुघा, खोकी, ज्वरोका विरामी बढि आउने गरेको अस्पतालले जनाएको छ । त्यस्तै सर्पको टाकाइका विरामी र सुत्केरी महिला विरामीको संख्या समेत उत्तिकै रहेको छ ।

अस्पतालमा विरामीको चाप बढ्दै गए पनि डाक्टर नहुँदा उपचारमा समस्या परेको हो । जिल्लाका विकट गाँउबाट उपचारका लागि आउनेहरु घण्टौ लाइनमा तथा बास बसेरै उपचार गराउन बाध्य छन् ।