काठमाडौं , श्रावण ७ - निर्वाचन आयोगले नयाँ संविधानसभा चुनावका लागि संविधान र कानुन संशोधन गर्न दिएको म्याद आइतबार सकिँदैछ । आयोगले घोषित मंसिर ७ मा चुनाव गर्न कम्तीमा तीन महिनाअघि साउन ७ भित्र संविधान र कानुन पाउनुपर्ने अल्टिमेटम दिएको थियो । आयोगले कुनै पनि निर्वाचनको तयारी गर्न १ सय २० दिन लाग्ने बताएको थियो ।

सरकारले बेवास्ता गरेको गुनासो गर्दै आयोग पदाधिकारीले थप एक साताको अन्तिम विकल्प दिन सकिने बताएका छन् । 'सरकारले अनुरोध गरे बढीमा सात दिनसम्म म्याद बढाउन सकिन्छ,' निर्वाचन आयुक्त अयोधीप्रसाद यादवले भने ।

नयाँ निर्वाचन गर्न अन्तरिम संविधान संशोधन, निर्वाचन आयोग ऐन २०६३, संविधानसभा सदस्य निर्वाचन ऐन २०६४, मतदाता नामावलीसम्बन्धी ऐन २०६३ तथा नियमावलीहरू संशोधन हुनुपर्ने छ । त्यसमा संशोधन आवश्यक बुँदाहरूसमेत खुलाएर आयोगले सरकारलाई बुझाएको थियो ।

आयोगले निर्वाचन मिति घोषणासँगै निर्वाचन आचारसंहिता लागू गरिसकेको छ ।