भारतीय महिलाको रहस्यमय मृत्यु

वीरगन्ज, फागुन २९-वीरगन्ज उपमहानगरपालिका-१९ नगवामा सोमबार एक भारतीय महिलाको रहस्यमय मृत्यु भएको छ।

 मृत्यु हुनेमा सीमावर्ती भारतीय सहर रक्सौल टुमरियाटोलाका ३० वर्षीया पावर्ती साह रहेको इलाका प्रहरी कार्यालय नगवाले जनाएको छ।
मृतक साह विगत एक महिनादेखि श्रीमान् र चार वर्षको छोरासँगै वीरगन्ज उपमहानगरपालिका-१९ नगवाको गणेश चोकस्थित नथुनी ठाकुरको घरमा डेरा गरी बस्दै आएकी थिइन्।

सीमावर्ती भारतीय सहर रक्सौल टुमरिया टोलका ऋषिकपुर साहसँग उनको दोस्रो विवाह भएको थियो।




पावर्ती बसेको कोठा बिहान अबेरसम्म नखुलेपछि शङ्का लागेर घरधनीले प्रहरीलाई खबर गरेको र प्रहरीले कोठा खोलेपछि उनी ओछ्याउनमै मृत अवस्थामा फेला परेकी थिइन्। घटनापछि चार वर्षीय छोरालाई लिएर पति ऋषिकपुर साह फरार रहेका छन्।

मृतक महिलाको शरीरमा अनौठो खालको दाग देखिएकाले मृत्यु रहस्यमय भएको इलाका प्रहरी कार्यालय नगवाका प्रहरी नायब निरीक्षक श्यामकिशोर यादवले बताए। उक्त दागका कारण कुटपिट वा विष सेवनवाट उनको मृत्यु हुन सक्ने प्रारम्भिक अनुमान प्रहरीको छ।

प्रहरीले मृतकको शव परीक्षणका लागि नारायणी उपक्षेत्रीय अस्पताल वीरगन्जमा पठाइएको छ। फरार श्रीमान्को खोजी कार्य सुरु गरिएको र शव परीक्षणको प्रतिवेदन आएपछि थप अनुसन्धान र कारबाही अगाडि बढाउने नगवाका प्रहरी नायब निरीक्षक यादवले बताए। रासस