५ चैत, काठमाडौं । आफ्ना मागप्रति सरकार गम्भीर नभएको भन्दै नेपाल पेट्रोलियम डिलर्स एशोसियसन र नेपाल ढुवानी व्यावसायी महासंघले पेट्रोलियम पदार्थको ढुवानी र वितरण ठप्प पार्ने तयारी गरेका छन् । उनीहरुले चैत १० गतेदेखि पेट्रोलियम पदार्थको ढुवानी र वितरण ठप्प पारेर सरकारका विरुद्ध आन्दोलनमा उत्रिने बताएका हुन् ।

आन्दोलनका कार्यक्रमहरु घोषणा गर्न दुबै संघले ९ र १० गते केन्द्रीय कार्यसमितीको बैठक डाकेको नेपाल पेट्रोलियम डिलर्स एशोसियसनका महासचिव विश्व अर्यालले बताउनुभयो । पेट्रोल पम्प व्यावसायीहरुले कमिसन बढाउन र ट्याङ्कर व्यावसायीहरुले भाडा बढाउन नेपाल आयल निगमसमक्ष माग गर्दै आएका छन् ।

 पेट्रोल पम्प व्यावसायीहरुले आफुहरुले पाउँदै आएको २ प्रतिशत कमिसन बढाएर ५ प्रतिशत पुर्याउनुपर्ने माग गरेका छन् ।निगमसँग पटक-पटक बार्तामा बस्दा पनि आफ्ना मागहरु पूरा गर्ने आश्वासन मात्र पाएको बताउँदै महासचिव अर्यालले माग पूरा गराउनेतर्फ निगम गम्भिर नदेखिएपछि बाध्य भएर आन्दोलनमा उत्रिने निर्णय गरेको बताउनुभयो । व्यावसायीहरुलाई आन्दोलनमा उत्रिन बाध्य पारिएमा देशभर पेट्रोलियम पदार्थको हाहाकार हुने उहाँले चेतावनी दिनुभयो ।

 सरकार के भन्छ ?

नेपाल सरकारका मूख्य सचिव लीलामणि पौडेलले ट्याङ्कर र पेट्रोल पम्प सञ्चालन गर्दा नाफा नभए अन्य पेशातर्फ लाग्न व्यावसायीहरुलाई सल्लाह दिनुभएको छ । ‘मैले ट्याङ्कर किनेर ढुवानी व्यावसाय गरिरहेको छु, राज्यले मलाई धेरै नाफाको व्यवस्था गरिदिनुपर्छ भन्ने मानसिकता व्यावसायीहरुमा छ’ उपभोक्ता अधिकार दिवसका दिन वाणिज्य विभागमा गरिएको कार्यक्रममा बोल्दै उहाँले भन्नुभयो- ‘व्यवसायीहरुले अत्यन्त गलत र घातक मानसिकता पालिरहेका छन् ।’ कसैलाई पनि एउटै व्यावसाय गर्नुपर्छ भन्ने कुनै बाध्यकारी अवस्था नभएको बताउँदै उहाँले मुलुकभित्र व्यावसायका अनेक विकल्पहरु खुला भएको बताउनुभएको छ । ढुवानी र वितरण नै ठप्प हुनेगरी आन्दोलनका कार्यक्रमहरु नगर्न उहाँले सम्बन्धित पक्षलाई आग्रह गर्नुभयो ।

 अत्यावश्यक वस्तु ठप्प पार्नु अपराध

अत्यावश्यक वस्तुको सुचीमा पर्ने पेट्रोलियम पदार्थको ढुवानी तथा वितरण ठप्प पारेर आन्दोलनमा उत्रिन लागेका व्यावसायीहरुलाई कडाभन्दा कडा कारबाही गर्नुपर्ने माग सर्वसाधारणले गरेका छन् । आफ्ना मागहरु पूरा गराउन उपभोक्ताको अधिकार नै हनन हुनेगरी आन्दोलनमा उत्रिनु गलत भएको उपभोक्ताकर्मी प्रेमलाल महर्जनले बताउनुभयो । कुनै व्यावसायीहरुले अत्यावश्यक वस्तुको कारोबार नै ठप्प पारेर आन्दोलनमा उत्रिने निर्णर्य गर्छ भने त्यसको व्यावसाय दर्ता नै खारेज गरेर अन्यलाई अवसर दिनुपर्ने उहाँको धारणा छ ।

बजारमा अभाव यथावत

नेपाल आयल निगमले पेट्रोलियम पदार्थको आपूर्ति र वितरण सहज भइसकेको बताएपनि राजधानीका पेट्रोल पम्पहरुमा सवारी साधनको लामो लाइन लागेको छ । अझैपनि सहज रुपमा तेल पाउन नसकेको सर्वसाधारणको गुनासो छ । निगमले पेट्रोल पम्पहरुलाई प्रयाप्त तेल उपलब्ध गराउन नसकेको व्यवासायीहरुको भनाइ छ ।

 निगमको मासिक घाटा आधा घट्यो

नेपाल आयल निगमको मासिक घाटा आधाभन्दा घटेर ३६ करोड पुगेको छ । भारतीय आयल निगमले आइतबार नेपाल आयल निगमलाई पठाएको मूल्य सुचिअनुसार घाटा आधाभन्दा कम देखिएको हो । भारतीय आयल निगमले मार्च १ तारिखमा पठाएको मूल्य सुचीमा नेपाल आयल निगमको घाटा ७३ करोड रुपैयाँ थियो । आइतबारको मूल्य सूची अनुसार निगमलाई पेट्रोलमा ११ करोड १३ लाख रुपैयाँ नाफा र डिजेलमा ११ लाख घाटा हुने देखिएको छ ।