भगवानको स्पष्टीकरण - 'आर्थिक विवादमा फसाउन खोजेकाले राजीनामा'

कर्मचारीद्वारा ज्ञापन, तत्काल स्वीकृत नगर्न प्रधानमन्त्रीको निर्देशन-
-->

कोइरालाले आफूले बिरामी जथाभावी रेफर गर्ने प्रवृत्ति नियन्त्रण गर्न र आय बढाउन खोजेपछि विभागीय प्रमुखहरुले गलत हल्ला चलाएर डिन र अन्य पदाधिकारीलाई अनावश्यक दबाब दिएको आरोप लगाएका छन्। 'यो साँच्चिकै दुःखदायी भयो, केही नेता र स्वच्छ छविका प्राध्यापकसमेत बिरामी अन्य अस्पतालमा पठाउन हुने कुराप्रति जस्टिफाई गर्नतिर लागे,' कोइरालाले लेखेका छन्।
अघिल्लो कार्यकालका आर्थिक विषयमा विशेष अडिट गर्न खोज्दा त्रिविका पदाधिकारीले समेत असहयोग गरेको उनको भनाइ छ। उनले आर्थिक लचकता अपनाइएका फाइलहरुलाई स्वीकृतिका लागि तीव्र दबाब आएको तर त्यसलाई नमान्दा नै विश्वविद्यालयले दैनिक काम नै रोकिने गरी थुप्रै फाइल अड्काएको उनले जनाएका छन्। 'फाइल अड्काउनुपछाडि मैलाई पैसाको कुरामा फसाउन खोज्नु प्रमुख कारण थियो,' कोइरालाले उल्लेख गरे।
उनी निकटस्रोतका अनुसार कोइरालाले थुपै्र अनियमितताका पुरानो भुक्तानी रोकेका थिए। त्यसमा संलग्न माथिल्ला निकायका पदाधिकारीले नयाँ फाइल स्वीकृतिको सर्तसमेत पुरानो भुत्तानी दिने कुरालाई बनाएका थिए। कोइरालाले घुमाउरो पारामा अनियमितताको आशंका लागेका पार्टीलाई अडिट नगरी भुक्तानी दिन स्वीकृत नगर्दा पनि पुराना सप्लाई (जुन कुनै पार्टीसँग सम्बन्धित थिए) लाई पुनः नियुक्ति नगर्नुले पनि पाइलापाइलामा माथिबाट असहयोग भएको उल्लेख गरेका छन्।
उनले अस्पताल निकै संकटमा रहेको अवस्थाबाट डिन प्रकाश सायमी र विश्वविद्यालयका अन्य पदाधिकारीले रेस्क्युका लागि विशेष आग्रह गरेको र सहयोगको सर्तसहित मुश्किलले मात्रै स्विकारेको स्मरण गराएका छन्। उनले ती पदाधिकारीले अस्पतालको पुरानो ऋण तिर्न गरेको बाचासमेत पूरा नगरेको बताए।
कोइरालाले प्रतिकूलताबीच पनि आफूले डिन कार्यालयको सहयोगमा केही पुरानो वक्यौता तिरेको, नागरिक लगानी कोषको वक्यौता तिरेको, समयमा तलब खुवाएको र आर्थिक हिसाबले अस्पताललाई सुधारको बाटोमा लगेको दाबी गरेका छन्। 'संकटमा रहेको संस्थालाई उद्धार गर्न मैले निश्चित रुपमा कडा बाटो लिनुपर्ने नै थियो,' उनले उल्लेख गरे। सोही आधारमा चिकित्सकलाई अनुशासनमा राख्न खोज्नु र सेवाको दायरा बढाएर आम्दानी बढाउन बिरामी रेफर गर्ने प्रवृत्ति रोकेको स्पष्ट गरेका छन्। त्यसका लागि भ्रष्टहरुलाई कानुनी कारबाही गरेको, विद्युतीय हाजिर अनिवार्य गराएको उनले बताए। यस्तो अवस्थामा अस्पताल प्रशासनिक स्टाफले भने ठूलो सहयोग गरेको उनको भनाइ छ।