अब मैले के गर्दा उचित होला ?
|
म २८ वर्षीया युवती हुँ। एक युवकलाई मनैदेखि चाहन्छु। ऊ मेरो फुपूको देवरको छोरा हो। एकपटक हाम्रो विवाहको कुरा पनि चलेको थियो। मैले हुन्छ भन्न खोजेकी थिएँ, तर त्यति बेला आमा बिरामी हुनुहुन्थ्यो। त्यसैले विवाहको कुरा अघि बढेन। अहिले उसको अर्कै युवतीसँग सम्बन्ध छ भनेर फुपूले सुनाउनुहुन्छ। मलाई भने होइन होला जस्तो लाग्छ। किनभने जहाँ भेट भए पनि उसले मलाई एकटकले हेरिरहन्छ। त्यसैले मलाई उसले माया गर्छ जस्तो लाग्छ। अब मैले के गर्दा उचित होला ?
एल
प्रेम गर्नेले आफ्नो मनको कुरा भन्ने आँट पनि गर्न सक्नुपर्छ। मैले तपाईंमा त्यसको कमी पाएँ। कुनै बेला विवाहको कुरा चलिसकेको युवकसँग मनमा लागेका शंका सोध्ने आँट तपाईंमा हुनुपर्यो। फुपूले उसको अर्कै युवतीसँग सम्बन्ध छ भनेको भरमा मन मारेर बस्नुहुँदैन। फेरि उसले भेटेको बेला एकटक हेरिरहन्छ भने ऊ पनि तपाईंसँग कुरा गर्न खोजिरहेको बुझिन्छ। उसले पनि आँट गर्न सकिरहेको छैन। उसले तपाईंलाई माया गर्छ कि गर्दैन भन्ने अन्यौलको अन्त्यका लागि एकपटक उसकै सामुन्ने गएर सोध्ने आँट गर्नुहोस्। यदि उसले तपाईंलाई मन पराइरहेकै रहेछ भने त राम्रै हुन्छ, तर मन पराउँदो रहेनछ वा उसको अन्य कुनै युवतीसँग सम्बन्ध छ भने पनि तपाईं निराशचाहिँ हुनु हुँदैन। यदि नकारात्मक उत्तर आयो भने पनि त्यसका लागि मनैदेखि तयार रहनुपर्छ।
|
|
