श्रीलंका ७ विकेटले विजयी

कोलोम्बो, चैत ७ (एएफपी)- रंगना हेराथले आफ्नो ३५औं जन्मदिन जीवनकै उत्कृष्ट प्रदर्शन गर्दै मनाएपछि श्रीलंकाले बंगलादेशविरुद्धको दोस्रो तथा अन्तिम टेस्ट ७ विकेटको सजिलो विजय हात पारेको छ। विजयसँगै घरेलु टोलीले शृंखला १-० ले जितेको छ।


देव्रेहाते स्पिनर हेराथले ८९ रन खर्चेर ७ विकेट लिए। उनको प्रभावकारी बलिङमा बंगलादेशको दोस्रो इनिङ्स मंगलबार २ सय ६५ रनमा समेटियो। ओपनर तिलकरत्ने दिलशानले ५७ र कुमार सांगाकाराले ५५ रन बनाउदैं दोस्रो विकेटमा ९४ रनको साझेदारी गरेपछि श्रीलंकाले १ सय ६० रनको लक्ष्य पाँचौं तथा अन्तिम दिनको खेलमा पुरा गर्‍यो।



शृंखलाको पहिलो ३ इनिङ्समा लगातार सतक बनाएका सांगाकाराले ८५ बल खेली ८ चौका प्रहार गरे। उनलाई सोहाग गाजीले आउट गरे। कुल ४ सय ४१ रन बनाई सांगाकारा म्यान अफ द सिरिजमा चुनिए। रोबिउल इस्लामको बलमा बोल्ड हुनु पूर्व ७३ बल खेलेका दिलशानले ६ चौका प्रहार गरे। टेस्ट भरी १२ विकेट लिएका हेराथ म्यान अफ द म्याचमा चुनिए। उनले तेस्रो पटक टेस्टमा १० वा सो भन्दा बढी विकेट लिएका हुन्।
'हेराथसँग यो भन्दा बढी के नै माग्न सकिन्छ? मुथैया मुरलिधरणको सन्यासपछि हेराथ हाम्रो आशा बन्दै आएका छन्,' पहिलो पटक एक शृंखलामा कप्तानी गरेका श्रीलंकाली कप्तान एन्जेलो म्याथ्युजले भने, 'हामी पहिलो इनिङमा केही दबाबमा थियौं, सांगाकारा र दिनेश चण्डिमालले उपयोगी सतक प्रहार गरे। बंगलादेशले निकै राम्रो खेलेको हो, तर मलाई मेरो टोलीका बारेमा कुनै शंका थिएन्।'
बंगलादेशले पहिलो इनिङ्समा २ सय ४० रनमात्र बनाउन सकेको थियो। सांगाकाराले १ सय ३९ र चण्डिमालले १ सय २ रन बनाएपछि श्रीलंकाले जबाफमा ३ सय ४६ रन बनाएर १ सय ६ रनको बढत लियो। १५८-४ बाट खेल्न सुरु गरेका बंगलादेशले अन्तिम दिनमा १ सय ७ रनमात्र जोडन सक्यो। 'हामीले दोस्रो इनिङ्समा सम्भवत १ सय रन कम बनायौं,' आफ्नो टोलीको तारिफ गरेका बंगलादेशका कप्तान रहिमले भने।
रहिमलाई ४० रनमा आउट गरी हेराथले टेस्ट क्रिकेटमा २ सय विकेट पुरा गरे। रहिमले १ छक्का र ३ चौका प्रहार गरे। पुछारका अबुल हसनले २ छक्का प्रहार गरी अविजित २५ रन बनाएपछि बंगलादेशले २ सय ५० रनको स्कोर पुरा गरेको थियो।