कर्मचारीलाई हाइसञ्चो, मन्त्रीलाई भ्याई नभ्याई

तर, सरकार परिवर्तन भएसँगै दक्षिण गेटको यो अवस्थामा निकै परिवर्तन आएको छ । कर्मचारीबाहेक अरु मान्छे त्यहाँ पुग्न छाडेका छन् । सिंहदरबार प्रवेश गर्ने दक्षिणढोकामा कार्यरत एक प्रहरी अधिकृतका अनुसार पहिले दैनिक झण्डै १४ सय सर्वसाधारण सिंहदरबार छिर्थे । अहिले यो संख्या झण्डै २ सय ५० मा झरेको छ ।

कर्मचारीलाई हाइसञ्चो

भित्र प्रवेश गर्ने मान्छे घटेपछि मूलढोकामा उभिएका सुरक्षाकर्मीलाई मात्र होइन, भित्र काम गर्ने कर्मचारीलाई पनि निकै हाइसञ्चो भएको छ । मन्त्री भेट्न र काम लिन भन्दै आउने नेता, कार्यकर्ता र निजी सचिवका आफ्ना मान्छेहरु नभएपछि अहिले मन्त्रीको निजी सचिवायल खालीजस्तै देखिन्छ ।

‘भीडभाड छैन, शान्त छ, निकै परिवर्तन आएको छ’ वन तथा भूसंरक्षण मन्त्रालयमा मन्त्रीको निजी सचिवालयमा कार्यरत कर्मचारी मीनबहादुर कुँवरले अनलाइनखबरसित भन्नुभयो-’पहिले त यहाँ खुट्टा राख्ने ठाउँसम्म हुन्नथियो ।’ यस्तै अनुभव छ कृषि विकास मन्त्रालयमा कार्यरत कर्मचारी दयानिधि दुवाडीको पनि । ‘काम लिन र भनसुन गर्न भन्दै आउने मान्छे नै छैनन् अहिले त’-उहाँले अनलाइनखबरसित भन्नुभयो ।

अनावश्यक मान्छे जान थालेपछि हाइसञ्चो त भएको छ नै । त्यसमाथि कर्मचारी संयन्त्र राम्रोसँग बुझेका मान्छे मन्त्री भएपछि कामको बारेमा भनिरहन पनि पर्दैन । ‘पहिलेका मन्त्रीहरुलाई बुझाउनै समय लाग्थ्यो’ आठजना मन्त्रीका सचिव भएर काम गरिसकेका शान्ति तथा पुननिर्माण मन्त्रालयका कर्मचारी प्रकाश महताराले भन्नुभयो-’अहिलेका मन्त्रीज्यूहरुलाई त सबै कुरा थाहा छ, हामीले केही भन्नै पर्दैन ।’

संघीय मामिला तथा स्थानीय विकास मन्त्रीको निजी सचिवालयमा कार्यरत कर्मचारी युवराज सुवेदीको अनुभव पनि यस्तै छ । ‘अहिलेका मन्त्रीज्यूहरु सबैले दैनिक कार्य सञ्चालनबारे राम्ररी कुरा बुझ्नु भएकाले हामीलाई सजिलो भएको छ ।’

बधाइ दिन जाने पनि छैनन्

राजनीतिक दलका नेता मन्त्री हुँदा सम्बन्धित पार्टीका अरु नेता, कार्यकर्ता मात्र होइन, विभिन्न क्षेत्रबाट बधाइको ओइरो लाग्थ्यो । भेटेरै बधाइ दिँदा आफूले लिन खोजेको काम पनि बन्ने भएकाले धेरैजना मन्त्रालयमै भेट्न आउँथे । तर, अहिले यस्तो छैन ।

‘पहिलेका मन्त्रीहरुलाई त नियुक्ति भएको महिनादिनसम्म पनि बधाइ र शुभकामना दिन भन्दै आउनेहरुको लाइन लाग्थ्यो, अहिले त्यस्तो छैन’ शान्ति मन्त्रीको निजी सचिवालयमा कार्यरत कर्मचारी प्रकाश महताराले अनलाइनखबरसित भन्नुभयो-’मन्त्रीलाई बधाइ दिनेहरुले ल्याइदिएको फूलमालाले किचनकोठा नै भरिन्थ्यो ।’ अहिलेका मन्त्रीलाई नियुक्ति र पदभार ग्रहण गरेको दिनमा बाहेक अरु दिन बधाइ दिन भनेर खासै मान्छे आएका छैनन् । ‘उहाँका समकालीन र मन्त्रालयका मान्छेहरुले हिजै बधाइ दिइहाल्नुभयो, परिवार र आफन्तले निवासमै भेटेर दिए होलान्, अब यहाँ अरु त को आउने ?’ वन तथा भूसंरक्षण मन्त्रालयका अर्का कर्मचारी नवराज अर्यालले भन्नुभयो ।

मन्त्रीलाई भने भ्याई नभ्याई

पहिलेको सरकारमा डा. बाबुराम भट्टराईको भागमा मात्रै धेरै मन्त्रालयको जिम्मेवारी थियो । तर, अहिले मन्त्रिपरिषदका अध्यक्ष खिलराज रेग्मी सहित जम्मा ११ जना मात्र सदस्य रहेकाले एकैजनाले चार/पाँचवटा मन्त्रालयसम्म भ्याउनुपर्ने अवस्था छ । त्यसैले एउटा मन्त्रालयमा छिर्नेबित्तिकै त्यहाँको जानकारी बुझेर मन्त्री फेरि अर्को मन्त्रालय पुगिहाल्छन् ।